URA E KURCAJT MBI LUMIN E ZEZE

Ura e Kurçajt ndodhet në jug të Krujës në hyrje të fshatit Kurçaj nga ana e Krujës, mbi lumin e Zezës që buron nga Qafa e Shtamës. Ura e Kurçajt i shërbente rrugës së shkurtër të karvaneve Tiranë-Krujë sipas këtij itinirari: Tiranë-Zall Herr-Rradhesh-Mukaj-Buronjë-Kurçaj-Barkanesh-Krujë. Në thembrat e qemerit të madh ruhen vrimat e trarëve të poshtëm të armaturës së harkut. Ura e Kurçajt është ndërtim i shekullit të XVIII-të. Është urë interesante me tre qemerë rrethorë. Qemeri i madh me hapësirë drite rreth 10 m është dëmtuar gjatë luftës II Botërore dhe është riparuar pas saj. Dy dritaret shkarkuese në brigjet janë të fazës origjinale të urës. Kalldrëmi origjinal ruhet në anën e djathtë, me gurë lumi me breza tërthorë në ngjitjet. Kalldrëmi ka parapet sigurues, me mur guri.