Teqeja e sari salltikut, dhe shpella në malin e vjetër

Teqja e Sari Salltikut në Krujë, shënon fillimin e historisë së teqeve në Shqipëri, së bashku me teqen në Malin e Tomorrit, Berat. Ngritja e këtyre dy teqeve, lidhet me misionarët bektashij që u vendosën në këto zona gjatë udhëtimeve misionare, dekada përpara se të shfaqeshin ushtritë osmane. E themeluar në gjysmën e parë të shek. XIV, ajo përbëhej nga tre ndërtesa të veçanta që dallonin për nga funksioni: një ndërtesë ku banonin dervishët punëtorë e zejtarë, e dyta për udhëtar të rastit, ndërsa e treta ka qenë e rezervuar për miq te veçantë, dëshmuar kjo dhe nga prezenca e mejdanit në këtë ndërtesë. Quhej teqja e Sari Salltikut, prej emrit të një misionari bektashi Sari Salltiku, i cili më vonë u shndërrua në personalitet të fesë bektashiane për shkak të punës së tij për hapjen e besimit bektashian në disa qytete : Shkup, Krujë, Ohër e Janinë. Që nga viti 1967 e në vijim objekti ka pësuar dëmtime të vazhdueshme. Sot objeki ruhet në gjëndje rrënoje dhe vetë një fragment muri. Teqja e Sari Salltikut ndodhet 1145m mbi nivelin e detit, në majën e shkëmbit që ngrihet mbi qytetin e Krujës. Pozicioni i saj është shumë piktoresk, që mga shfaqet ultësira perëndimore, Fushë-Kruja, deti Adriatik në veri, dhe në ditë të qarta mund të shquhet dhe Ulqini.