Mali i Vilës / Muri antik dhe varri i Përsqopit

Midis kështjellës së Petrelës dhe fshatit Shënkoll, rreth 1.5 km larg nga Petrela, në shpatin e malit, ndodhen muret e periudhës antike të Persqopit, që duhet ti përkasi një qyteti tashmë të shkatërruar. Përveç mureve antike në Përsqop ruhen dhe gjurmë të shumta të banesave, si dhe gjurmët e një varri dhe të një fontane të dyja monumentale. Nga muret rrethuese ato që ruhen më mirë janë bastionet, që ndodhen në anën jugore dhe veriore të qytetit. Bastioni jugor i murit ka një gjatësi prej 58 m, dhe një gjërësi prej 12 m. Bastioni ruhet në një lartësi të konsiderueshëme prej 7 m. Muret e qytetit vendosen mbi themele që futen nën tokë në një thellësi prej 1.10 m. Për ndërtimin e tyre janë përdorur gurë të marrë në vend. Gurët e themeleve janë të përpunuar dhe janë hedhur ashtu siç janë gjetur në natyrë. Themeli del ne 10-15 cm jashtë murit rrethues, duke krijuar kështu një mbështetje për të. Muri është ndërtuar me blloqe kuadratike, me madhësi që nuk lëvizin shumë nga njëri-tjeteri. Gurët që ndërtojnë murin kanë një lartësi që shkon nga 80 deri në 85 cm. Ata janë të punuar me daltë pothuajse nga të gjithë anët.