KULLA E TAF BASHES

Banesa është ndërtuar në lagjen e sipërme të fshatit. Terreni i pjerrët ka kushtëzuar kompozimin me gjysëm kat. Kati përdhes i pjesës dykatëshe ka shërbyer për futjen e bagëtive dhe ka hyrje të veçantë nga jashtë. Në katin e banuar kalohet nga një mjedis me përmasa të mëdha, i cili përveç funksionit ndërlidhës përdorej dhe për gatim. Nga tipologjia dhe të dhënat e tjera që afron monumenti, mendojmë se banesa është ndërtuar në gjysmën e dytë të shekullit të XIX-të. Restaurimi i banesës u krye në vitin 1985. Këto punime prekën disa struktura si, ajo e murit perimetral jugor dhe konstruksionin prej druri të nyjeve sanitare, por dhe mjaft elemente që ishin pjesërisht dhe plotësisht të degraduar. Nga ky mjedis me anën e shkallëve prej druri kalohet tek oda e miqve, e pjesës dykatëshe. Oda e miqve është e pasuvatuar dhe pa tavan. Në pjesën veriore gjindet qoshku karakteristik, i cili del në formë konsoli tej faqes së jashtme të murit perimetral. Nga qoshku nëpërmjet dritareve të ndërtuara në muret kufizuese të tij mund të soditet lirshëm natyra përreth. Muratura është prej guri e lidhur me llaç e me breza druri. Ornamentika është e varfër.