KISHA E SHËN NDOIT

Kisha e Shën Ndout ngrihet në një qafë të ulët ndërmjet dy kodrave në Kepin e Rodonit të njohur ndryshe si Muzhli i Skëndërbeut, shumë pranë bregut të detit. Pranë kishës dikur gjëndej dhe manastiri. Referuar materialit historik ky manastir njihej me emrin Shën Ndou, nga ku mendohet të ketë marë dhe emrin kisha. Kjo kishë ishte ndër kuvendet më të vjetra françeskane dhe i përket vitit 1599. Për të thuhet gjithashtu se e ndërtoi e motra e skëndërbeut për murgeshat. Kisha paraqet një vëllim paralelpipedi me planimetri drejtëkëndore dhe përbëhet nga narteksi, naosi, dhe ambjenti i altarit. Narteksi ka drejtimin veri-jug. Lidhja ndërmjet narteksit dhe naosit realizohet përmes një hyrje të ngushtë. Një hark i mprehtë ndanë hapsirën e naosit nga altari. Naosi i mbuluar me çati druri ndërsa altari me qemer. Në anën e jashtëme të kishës dallohen qartazi harqet e mprehtë të vendosura mbi pilastara me drejtim veri-jug. Nga pikpamja arkitektonike monumenti i takon stilit romaniko-gotik.