HAMAMI MESJETAR

Hamami ndodhet pranë qendrës së qytetit, brënda mureve të kalasë mesjetare është ndërtuar në shek. XVIII dhe ka marrë statusin monument kulture në vitin 1973. Ai përbëhet nga katër ambjente. Në qendër të kompozimit planimitrik të tij, ndodhet ambjenti i zhveshjes, që është dhe më i madhi. Në të djatht janë vendosur dy ambjente më të vogla, njëri pas tjetrit që shërbenin për larje. Pas tyre ndodhet depo e ujit, e cila zë të gjithë gjerësinë e objektit, ajo shërbente për furnizimin me ujë të banjave. Pjesa qëndrore e objektit është realizuar me kupolë ndërsa pjesa tjetër që është më e ulët është realizuar me harqe guri. Ndriçimi depërton brënda nëpërmjet dritareve të vogla të kupolës me përmasa 15x15cm. Ngrohja e ambjenteve bëhej nëpërmjet kazanëve të bakrit, ku avulli qarkullonte nëpërmjet tubave prej qeramike.