Banesa e Muharrem Hoxhës

Banesa është me “kullëzës” dhe “qoshk”. Në këtë shembull kulla ngrihet mbi qoshen veriperëndimore. Banesa është dykatëshe, në planimetri ka formën e shkronjës L. Restaurimi i bërë në vitin 1978 pati për qëllim sigurimin e gjëndjes statike të monumentit, nëpërmjet zëvendësimit të elementeve të degraduar. Kati përdhes përmban katër mjedise për futjen e bagëtive. Secili mjedis ka hyrje të veçantë nga jashtë. Po këtë ndarje ka dhe kati i banuar. Në njërin krah ndodhet shtëpia e zjarrit dhe në vazhdim të saj oda e miqve që përmban “qoshku” karakteristik. Në krahun tjetër ndodhen dy mjedise për banim. Gjatë kohës shtëpia e zjarrit është ndarë në dy pjesë dhe janë krijuar nëpërmjet saj lidhje me “burgun” e katit përdhes. Me interes është ndërtimi i qoshkut. Faqja e jashtme mbyllet me një kapak të lëvizshëm. Kur kapaku ngrihet lart qoshku mbetet i hapur, duke qenë i pajisur me parmak, ai kthehet në një vend të këndshëm për ndenjje. Të dy mjediset e banimit kanë përmasa të vogla, njëri prej të cilëve paraprihej nga një qoshk i madh, që kishte përmasat e një korridori, më vonë ky mjedis u kufizua me një mur prej guri.